బిగ్ బాస్ సీజన్ 7 హోస్టుగా బాలయ్య
By KTV Telugu On 20 December, 2022
ఆహా ఓటీటీ ప్లాట్‌ఫామ్‌పై నందమూరి బాలయ్య తనదైన స్టైల్‌లో నిర్వహిస్తున్న అన్ స్టాపబుల్ 2 టాక్ షో అందరినీ ఆకట్టుకుంటోంది. సినీ, రాజకీయ రంగాలకు సంబంధించిన ప్రముఖులను ఆహ్వానించి వారితో సరదాగా సంభాషిస్తూ షోను రక్తికట్టిస్తున్నారు బాలయ్య. అన్ స్టాపబుల్ ను నెంబర్ వన్ టాక్ షోగా నిలబెట్టారు. త్వరలో బాలయ్య బుల్లితెరపై మరో రూపంలో కనిపించబోతున్నారనే వార్తలు వస్తున్నాయి. బిగ్‌బాస్‌ రియాలిటీ షో 6 ముగిసిపోయింది. దానికి నాగార్జున హోస్టుగా వ్యవహరించారు. అయితే ఒక్కో సీజన్ కు ప్రేక్షకుల్లో ఆ షో పట్ల ఆసక్తి తగ్గిపోతూ వస్తోంది. సీజన్ 6 కు ఐతే ఆదరణ మరింత తగ్గింది. దాంతో నిర్వాహకులను ఆలోచనలో పడ్డారని టాక్.
అందువల్ల బిగ్‌బాస్‌ 7 కు వ్యాఖ్యాతగా బాలయ్యను తీసుకోవాలనే ఆలోచనలో నిర్వాహకులు ఉన్నట్టుగా సమాచారం. ఇప్పటికే అన్‌స్టాపబుల్‌తో హోస్టుగా గా తానేమిటో బాలకృష్ణ నిరూపించుకున్నారు. బిగ్ బాస్ సీజన్ 7 కి హోస్టుగా ఉండేందుకు నిర్వాహకులు బాలయ్యతో సంప్రదింపులు జరుపుతున్నారట. త్వరలోనే అధికారిక ప్రకటన వచ్చే అవకాశం ఉందని అంటున్నారు. ఇంతవరకు ప్రసారమైన బిగ్‌బాస్‌ సీజన్లలో సీజన్ 6 ప్రేక్షకుల సహనానికి పరీక్ష పెట్టింది. కంటెస్టెంట్ల ఎంపిక మీద మొదట్లోనే అందరూ పెదవి విరిచారు. ఇక హౌస్‌లో కంటెస్టెంట్లు చేసే ఓవరాక్షన్‌ మీద ట్రోలర్స్‌ విరుచుకుపడ్డారు. టాస్క్‌లు ఆకట్టుకునేలా లేకపోవడం, వినోదం పాళ్లు తగ్గడంతో రేటింగ్స్‌ దారుణంగా పడిపోయింది. బాలయ్య అయితే తన మార్కు డైలాగులతో షోను నిలబెడతారని అనుకుంటున్నారు.
ఈ వార్త విని బాలయ్య ఫాన్స్‌ సంతోషంతో ఉబ్బి తబ్బిబ్బవుతుతన్నారు.