ముందస్తు ఎన్నికలకు సిద్ధం కావాలన్న చంద్రబాబు
By KTV Telugu On 13 October, 2022
1. అలసత్వం ప్రదర్శించే నేతల చిట్టా నా వద్ద ఉంది
2. అన్‌స్టాపబుల్‌ 2 ప్రోగ్రాం గురించి సమావేశంలో చర్చ
ఆంధ్రప్రదేశ్‌లో ముందస్తు ఎన్నికలు వస్తాయనే ఆలోచనతో నేతలు పనిచెయ్యాలని టీడీపీ అధినేత నారా చంద్రబాబు నాయుడు అన్నారు. ఎన్నికలు ఎప్పుడు వచ్చినా ఎదుర్కొనేందుకు అన్ని విధాలుగా సిద్దంగా ఉండాలని పార్టీ నేతలకు పిలుపునిచ్చారు.
టీడీపీ నియోజకవర్గ ఇంచార్జ్ లు, ముఖ్యనేతలతో జూమ్ కాన్ఫరెన్స్ ద్వారా చంద్రబాబు స‌మావేశ‌మ‌య్యారు.
మీ పనితీరు ద్వారా మీరు ఎన్నికల్లో గెలుస్తామని ప్రూవ్ చేసుకోవాలని.. లేకపోతే కఠినమైన నిర్ణయాలు ఉంటాయని చెప్పారు. పార్టీ సభ్యత్వ నమోదు, కార్యక్రమాల విషయంలో వెనుకబడి ఉన్న నేతలను స్పీడు పెంచాలని సూచించారు. జగన్‌ ప్రభుత్వం మీద ఉన్న ప్రజా వ్యతిరేకతను అనుకూలంగా మార్చుకోవాలని సూచించారు. ఈ విషయంలో అలసత్వం ప్రదర్శించే నేతల లెక్కలు కూడా తన వద్ద ఉన్నాయంటూ చంద్రబాబు వ్యాఖ్యానించారు. ఆహా ఓటీటీ వేదిక‌పై నందమూరి బాలకృష్ణ నిర్వహిస్తున్న అన్ స్టాపబుల్ 2 షో గురించి కూడా ఈ మీటింగ్‌లో చర్చ జరిగింది. బోల్డ్ గా ఉండే బాలకృష్ణ శైలి కారణంగా ఆ షో అంత హిట్ అయ్యిందని చంద్రబాబు అన్నారు. తాను ఆ షో ఇంటర్వ్యూకి హాజరు అయ్యానని చంద్రబాబు తెలిపారు. నాడు అధికార మార్పిడి విషయంలో వాస్తవంగా జరిగింది ఏమిటి అనేది ఆ షోలో చర్చకు వచ్చిందని చెప్పారు. దశాబ్దాలుగా తనపై బురద జ‌ల్లుతున్న అంశంలో తాను ఓపెన్ గా పలు విషయాలు మాట్లాడానని పార్టీ నేతలకు వివరించారు చంద్రబాబు.