సూర్యకుమార్ సూపర్ సెంచరీ..
By KTV Telugu On 20 November, 2022
న్యూజిలాండ్ బౌలర్లను ఉతికారేసిన సూర్య
తన టీ20 కెరీర్‌లో రెండో శతకం నమోదు
టీమిండియా స్టార్ బ్యాట్స్ మెన్, వరల్డ్ నంబర్ వన్ ఆటగాడు సూర్యకుమార్ యాదవ్ విధ్వంసం సృష్టించాడు. బే ఓవల్‌లో జరుగుతున్న సెకండ్ టీ 20లో బ్యాట్ తో వీర విహారం చేశాడు. న్యూజిలాండ్ బౌలర్లను ఉతికిఆరేశాడు. ఆకాశమే హద్దుగా చెలరేగిపోయాడు. పిచ్ పై డ్యాన్స్ చేస్తున్నట్లుగా ఎడాపెడా బౌండరీలు, సిక్సర్లతో విరుచుకుపడ్డాడు. కేవలం 49 బంతుల్లోనే శతకం బాదాడు. తన టీ20కెరీర్ లో రెండో సెంచరీ నమోదు చేశాడు.
మొత్తంగా 51 బంతులు ఎదుర్కొని 11 ఫోర్లు, 7 సిక్సర్లతో 111 పరుగులు చేశాడు. సూర్యకుమార్ యాదవ్ బ్యాటింగ్ చేస్తున్నంత సేపు కివీస్ బౌలర్లు అలా చూస్తూ ఉండిపోయారు. బంతిని బౌండరీలకు పరుగులు పెట్టిస్తుంటే తెల్లమొహం వేయడం తప్ప ఏమీ చేయలేని నిస్సాహాయ స్థితిలో ఉండిపోయారు. సూపర్ ఫామ్‌లో ఉన్న సూర్య వరల్డ్ కప్‌లోనూ అద్భుతంగా రాణించాడు.
టాస్ ఓడి మొదట బ్యాటింగ్ కు వచ్చిన భారత్ నిర్ణీత 20 ఓవర్లలో ఆరు వికెట్లు కోల్పోయి 191 పరుగులు చేసింది. న్యూజిలాండ్‌కు 192 పరుగుల లక్ష్యాన్ని విధించింది. యువ బ్యాటర్ ఇషాన్ కిషన్ 31 బంతుల్లో 5ఫోర్లు, 1 సిక్స్ తో 36 పరుగులు చేసి ఆకట్టుకున్నాడు. మరో ఓపెనర్ రిషబ్ పంత్ విఫలమయ్యాడు. 13 బంతులు ఆడి ఆరు పరుగులకే ఔటయ్యాడు. శ్రేయస్ అయ్యర్ 13 పరుగుల వద్ద హిట్ వికెట్ గా వెనుదిరిగాడు. 6.4 ఓవర్లలో భారత్ 50/1 స్కోరు ఉన్న సమయంలో వర్షం రావడంతో ఆట నిలిచిపోయింది. ఆతర్వాత గ్రౌండ్‌లోకి వచ్చిన సూర్యకుమార్ చెలరేగిపోయాడు. చివరి ఓవర్లో పాండ్యా, దీపక్ హుడా, సుందర్ లను ఔట్ చేసిన టిమ్ సౌథీ హ్యాట్రిక్ సాధించాడు.