చంద్రబాబుతో రజనీకాంత్ భేటీ వైరల్ మొన్న పవన్.. నిన్న తలైవా
By KTV Telugu On 10 January, 2023
మొన్న పవన్ కళ్యాణ్.. నిన్న రజనీకాంత్. చంద్రబాబుతో స్టార్స్ భేటీ ఏపీ రాజకీయాల్లో చర్చనీయాంశంగా మారింది. పవన్ కళ్యాణ్ చంద్రబాబును కలిసిన మరుసటి రోజే తలైవా టీడీపీ అధినేతను కలుసుకోవడం విశేషం. చంద్రబాబు, పవన్‌ల భేటీ ఏపీలో పొత్తులకు తెరలేపగా రజనీకాంత్ సీబీఎన్‌ల భేటీ వెనుక సీక్రెట్ ఏంటనేది సస్పెన్స్‌గా మారింది. సోమవారం హైదరాబాద్‌కు వచ్చిన సౌత్ సూపర్‌ స్టార్ రజనీకాంత్ చంద్రబాబును ఆయన నివాసంలో కలుసుకొని కొద్దిసేపు ముచ్చటించారు. తన స్నేహితుడ్ని కలవడం చాలా ఆనందంగా ఉందంటూ చంద్రబాబు ట్వీట్ చేశారు. అటు రజనీకాంత్ కూడా తన ప్రియ మిత్రుడు చంద్రబాబు నాయుడును చాలా కాలం తర్వాత కలుసుకోవడం పట్ల సంతోషం వ్యక్తం చేశారు. ఆయన మంచి ఆరోగ్యంతో పాటు రాజకీయ జీవితంలో గొప్ప విజయాన్ని సాధించాలని ఆకాంక్షిస్తున్నాను అంటూ రజనీకాంత్ ట్వీట్ చేశారు. ఇందుకు సంబంధించిన ఫొటో సోషల్ మీడియాలో వైరల్‌గా మారింది.
తలైవా బాబును కలవడం స్నేహమా లేక రాజకీయ వ్యూహమా అనే హాట్ హాట్ డిస్కషన్ నడుస్తోంది. షూటంగ్‌ నిమిత్తం హైదరాబాద్‌ వచ్చి చంద్రబాబును కలిశారా లేక కుప్పం ఘటన తెలుసుకొని మిత్రుడికి మద్దతివ్వడానికి వచ్చారా అనే విషయాలు మాత్రం బయటకురాలేదు. అంతకు ముందు రోజే పవన్ కళ్యాణ్ చంద్రబాబుతో భేటీ అయి సుమారు రెండు గంటల పాటు చర్చించడం ఏపీ పాలిటిక్స్‌లో కాక రేపింది. ఇక ఇదే టైమ్‌లో రజనీకాంత్ కూడా చంద్రబాబుని కలవడం ప్రాధాన్యత సంతరించుకుంది. రజనీకాంత్ తన మద్దతు తెలపడానికే బాబును కలిశారని తమ్ముళ్లు భావిస్తున్నారు. కుప్పంలో బాబుపై తమిళ్ హీరో విశాల్‌ను వైసీపీ బరిలోకి దింపనుందనే ప్రచారం కొద్దికాలంగా జరుగుతోంది. అయితే ఆ వార్తలను ఇటీవల విశాల్ కొట్టిపారేశారు. ఏపీకి వచ్చిన సందర్భంగా సీఎం జగన్‌ను కలిశారని తెలిసింది. ఇలాంటి సమయంలో వైసీపీకి విశాల్ ఉంటే తమకు ఏకంగా రజనీకాంత్ ఉన్నాడని చెప్పే ప్రయత్నంలో భాగంగానే తలైవా-టీడీపీ అధినేతల భేటీ జరిగిందనే ఊహగానాలు వినిపిస్తున్నాయి.
విశాల్ జగన్ ఎపిసోడ్‌ అలా ఉంటే ఇప్పుడు చంద్రబాబు-రజనీకాంత్ భేటీ సరికొత్త రాజకీయ చర్చకు తెరలేపింది. తలైవా ఫ్యాన్ ఫాలోయింగ్‌ తమకు అనుకూలంగా మల్చుకునే ఎత్తుగడలో భాగంగానే రజనీని బాబు ఇంటికి ఆహ్వానించారని రాజకీయ వర్గాలు భావిస్తున్నాయి. రజనీకాంత్ గతంలో రాజకీయ రంగ ప్రవేశం చేస్తానని ప్రకటించటమే కాకుండా పార్టీ పేరు గుర్తును రిజిస్టర్ చేపించారు. ఆ తర్వాత అనూహ్యంగా వెనక్కి తగ్గారు. అదే సమయంలో ఏపీ అసెంబ్లీలో చంద్రబాబుకు జరిగిన ఘటనపై ఫోన్ చేసి మరీ రజనీకాంత్ పరామర్శించారు. ఇక ఇప్పుడు నేరుగా వచ్చి కలిశారు. రజనీకాంత్ ప్రస్తుతం జైలర్ సినిమాలో నటిస్తున్నారు. నెల్సన్ దిలీప్ కుమార్ దర్శకత్వంలో ఈ సినిమా హైదరాబాద్‌లో షూటింగ్ జరుపుకుంటోందని తెలుస్తోంది.