అన్ స్టాపబుల్-2 టాక్ షోకి గెస్ట్‌గా పవన్ కల్యాణ్
By KTV Telugu On 16 December, 2022
జనసేన అధినేత పవన్ కళ్యాణ్ రాజకీయాల్లో ఎంత బిజీగా ఉన్నా సినిమాల షూటింగ్‌లకు తగినంత సమయం కేటాయిస్తున్నారు. సాధారణంగా ఆయన ఎవరికీ ఇంటర్వ్యూలు ఇవ్వరు. టీవీ షోలకు హాజరుకారు. అయితే మొదటిసారి ఆయన తన ఒక టాక్‌షోలో పాల్గొనబోతున్నారని ప్రచారం జరుగుతోంది. ఆహా ఓటీటీ ప్లాట్‌ఫామ్‌లో ప్రసారం అవుతున్న అన్ స్టాపబుల్ టాక్ షోను నందమూరి బాలకృష్ణ తనదైన స్టైల్‌తో రక్తికట్టిస్తున్నారు. ఈమధ్యే ఆ టాక్‌షో రెండో సీజన్ కూడా ప్రారంభమైంది. చంద్రబాబు, లోకేశ్‌ తో రెండవ సీజన్ మొదలెట్టిన బాలకృష్ణ ఆ తరువాతి నుంచి కూడా టాలీవుడ్‌ అగ్రతారలను తన షోకు పిలిచి ఇంటర్వ్యూలు చేస్తున్నారు. ఇప్పటికే పలువురు ప్రముఖులతో ఎపిసోడ్లు నిర్వహించిన బాలకృష్ణ లేటెస్ట్ ఎపిసోడ్ కు పవన్ కల్యాణ్ ను ఆహ్వానించినట్టు ఇన్‌డైరెక్టుగా వెల్లడించారు.
దీనికి సంబంధించిన టీజర్ ను ఆహా ఓటీటీ విడుదల చేసింది. అందులో డైరెక్టర్‌ త్రివిక్రమ్ శ్రీనివాస్ కు బాలయ్య ఫోన్ చేసి ఏం త్రివిక్రమ్ అన్ స్టాపబుల్ షోకు ఎప్పుడొస్తున్నావ్ ? అని అడిగారు. దానికి త్రివిక్రమ్ మీరు ఓకే అంటే వెంటనే వచ్చేస్తాను సర్ అని బదులిచ్చారు. దానికి బాలయ్య ఎవరితో రావాలో తెలుసుగా అని అడిగారు. ఆ వచ్చేది ఎవరు అనేది ఆ టీజర్‌లో వెల్లడించలేదు. అయితే కచ్చితంగా త్రివిక్రమ్ వెంట వచ్చేది పవన్ కళ్యాణే అని అందరికీ అర్థమైపోయింది. ఎందుకంటే, పవన్ కళ్యాణ్, త్రివిక్రమ్ మంచి స్నేహితులు. అందుకే బాలయ్య వీరిద్దరినీ కలిపి ఇంటర్వ్యూ చేసేందుకు ప్లాన్ చేసినట్టు తెలుస్తోంది. నిజంగా పవన్ ఈ టాక్‌షోకు హాజరైతే బాలయ్య ఏం అడుగుతారు. పవన్ ఏం చెబుతారనేది అందరిలోనూ ఆసక్తి రేకెత్తిస్తోంది.