మెగా స్టార్ కేరాఫ్ అడ్రస్ మాలీవుడ్
By KTV Telugu On 13 November, 2022
మరో రీమేక్ పై కన్నేసిన చిరు?
మోహన్ లాల్ సినిమాలను అదే పనిగా చూస్తున్న చిరంజీవి?
చిరుకు ఈ మధ్య మాలీవుడ్ మూవీస్ ఫీవర్ పట్టుకున్నట్లు ఉంది. అందుకే ఎన్నడూ లేని విధంగా మలయాళ సినిమాలను తెలుగులోకి రీమేక్ చేస్తున్నాడు. లూసిఫర్ రీమేక్ గా గాడ్ ఫాదర్ తెరకెక్కిన సంగతి తెలిసిందే.
ఆ తర్వాత మమ్ముట్టి నటించిన బ్లాక్ బస్టర్ భీష్మపర్వం చిత్రాన్ని తెలుగులో చిరు రీమేక్ చేయబోతున్నట్లు వార్తలు వినిపించాయి. ఇప్పుడు మరో మాలీవుడ్ మూవీ బ్రో డాడీ వైపు చిరు చూస్తున్నాడట. లూసిఫర్ కాంబినేషన్ లోనే ఈ మూవీ కూడా తెరకెక్కింది. పృథ్వీరాజ్ సుకుమారన్ డైరెక్ట్ చేసి యాక్ట్ చేసిన మూవీ ఇది. మోహన్ లాల్, పృథ్వీరాజ్ తండ్రి తనయులుగా నటించారు. జనవరిలో హాట్ స్టార్ లోకి డైరెక్ట్ గా రిలీజైంది. ఈ చిత్రంలో తండ్రి తనయులు ఇద్దరూ ఒకేసారి తండ్రులుగా ప్రమోషన్ అందుకోవడంతో కథ ఆసక్తికర మలుపు తిరుగుతుంది. తెలుగు రీమేక్ లో చిరు మరోసారి మోహన్ లాల్ క్యారెక్టర్ ను రిపీట్ చేసినా, పృథ్వీరాజ్ క్యారెక్టర్ ఎవరు చేస్తారనేది ఆసక్తికరంగా మారింది. మరోవైపు ఈ కామెడీ మూవీని తెలుగులో ఆ స్థాయిలో రీమేక్ చేసే దర్శకుడు దొరకడం కూడా చిరుకు ఇబ్బందే. ప్రస్తుతం మెగాస్టార్ వాల్తేరు వీరయ్య, భోళాశంకర్ చిత్రాలను మాత్రమే చేస్తున్నాడు. ఈ రెండు సినిమాలు విడుదలైన తర్వాతే బ్రో డాడీ రీమేక్ పై చిరు ఒక అభిప్రాయానికి వచ్చే అవకాశాలు ఉన్నాయి.