రొమాన్స్ దగ్గర్నుంచి రాజకీయాల వరకు..?
By KTV Telugu On 12 October, 2022
బాలకృష్ణ, చంద్రబాబుల అన్ స్టాపబుల్ షో
రాజకీయపరమైన అంశాలపై పేలిన డైలాగులు
వైఎస్సార్ తన బెస్ట్ ఫ్రెండ్ అన్న చంద్రబాబు
షో వేదికగా వైసీపీకి కౌంటర్లు
మంగళగిరి ఓటమిపై సెంటిమెంట్ పండించిన లోకేశ్
టీడీపీ అధినేత చంద్రబాబు సరికొత్త రాజకీయం మొదలుపెట్టారు. ఎప్పుడూ పాలిటిక్స్ లో బిజీబిజీగా గడిపే చంద్రబాబు..ఓ టాక్ షోలో మెరిశారు. నందమూరి హీరో, ఎమ్మెల్యే బాలకృష్ణ వ్యాఖ్యాతగా వ్యవహరించిన అన్ స్టాపబుల్ షోలో పాల్గొని…వైసీపీకి కౌంటర్లు ఇచ్చారు. ఈ టాక్ షోలో తొలి ఎపిసోడ్ చంద్రబాబుతో సిద్దమైంది. ఈ సందర్భంగా బాలయ్య వేసిన ప్రశ్నలు…చంద్రబాబు తనదైన స్టైల్లో సమాధానాలు హైలెట్ అయ్యాయి. రాజకీయంగా పలు కీలక అంశాలపై బావమరిది వేసిన ప్రశ్నలకు జవాబు ఇచ్చారు బాబు. ఇక, మధ్యలో లోకేష్ ఎంట్రీ ఇవ్వడం…మామా, అల్లుళ్ల మధ్య డైలాగులు పేలడం…అందులో రాజకీయపరమైన అంశాలుండడంతో ఈ షో స్పెషల్ అట్రాక్షన్ గా మారింది. ఆహాలోఈనెల 14న షో టెలికాస్ట్ కానుండగా… ఇందుకు సంబంధించిన ప్రోమో యూట్యూబ్ లో ట్రెండింగ్ లో నిలిచింది.
ఏపీలో చంద్రబాబు టార్గెట్ గా వైసీపీ రాజకీయ వ్యూహాలు అమలు చేస్తోంది. ఎన్టీఆర్ పై ప్రశంసలు కురిపిస్తూ చంద్రబాబును ఇరుకునపెడుతోంది. కృష్ణా జిల్లాకు ఎన్టీఆర్ పేరు పెట్టి, ఆయనపై చంద్రబాబు కంటే తమకే ఎక్కువ గౌరవమని చాటుకునే ప్రయత్నం చేసింది. అయితే, ఇటీవల ఎన్టీఆర్ యూనివర్సిటీ పేరు మార్చి జగన్ విమర్శలు ఎదుర్కోగా….1995 నాటి ఎపిసోడ్ ను పెద్ద ఎత్తున ప్రచారంలోకి తీసుకొచ్చి బాబు లక్ష్యంగా వైసీపీ నేతలు చెలరేగిపోయారు. ఇప్పుడు బాలయ్య టాక్ షోలో చంద్రబాబు అలాంటి పనే చేశారు. నాటి అనేక సందేహాలను నివృత్తి చేస్తూనే, వైఎస్సార్ తో తన బంధం గురించి చెబుతూ జగన్ కు కౌంటర్ ఇచ్చే ప్రయత్నం చేశారు. తన బెస్ట్ ఫ్రెండ్ వైఎస్సార్ అంటూ అన్ స్టాపబుల్ షో లో చెప్పుకొచ్చారు చంద్రబాబు. దీనిపై తమ్ముళ్లు పంచ్ పడింది అంటూ వైసీపీ నేతలపై సెటైర్లు పేల్చుతున్నారు.
ఇక, లోకేష్ పై తరచూ వస్తున్న విమర్శలకు బాలయ్య ఈ షో ద్వారా సమాధానం చెప్పించారు. లోకేశ్ స్విమ్మింగ్ పూల్ ఫొటోలు అసెంబ్లీ వరకు వచ్చాయి. దీనిపై మీ కామెంట్ ఏంటి బావ అంటూ బాలకృష్ణ చంద్రబాబును ప్రశ్నించగా… మామకు లేని అభ్యంతరం తనకు దేనికంటూ చంద్రబాబు లౌక్యంగా తప్పించుకున్నారు. మంగళగిరిలో తొలి అడుగులోనే ఓటమి పాలయ్యారు కదా అని బాలయ్య అడగగా.. సంకల్పంతో ప్రయత్నించానంటూ లోకేష్ సెంటిమెంట్ పండించారు. ఇక, ఎప్పుడూ గంభీరంగా కనిపించే చంద్రబాబుతో తన బావమరిది బాలయ్య…ఏకంగా రొమాంటిక్ అంశాలను ప్రస్తావించి షోను ఓ రేంజ్ కు తీసుకెళ్లారు. బావ, బావమరుదుల కాంబినేషన్ తో …. టీడీపీ అన్ స్టాపబుల్ అంటూ తమ్ముళ్లు ప్రచారం మొదలు పెట్టారు.