లవర్ ను మార్చేసిన టిల్లు
By KTV Telugu On 3 October, 2022
*ఈసారి మాలీవుడ్ బ్యూటీతో లవ్
*ఛాన్స్ మిస్ చేసుకున్న పెళ్లి సందడి హీరోయిన్
డీజే టిల్లు ఎంత ఫేమసో, అతని గర్ల్ ఫ్రెండ్ రాధిక కూడా అంతే ఫేమస్. పటాస్ పిల్లా అంటుంటారు డిజే టిల్లు ఫ్యాన్స్.
మొదటి భాగంలో నేహా శెట్టి రాధిక క్యారెక్టర్ లో మెస్మరైజ్ చేసింది. డీజే టిల్లును పిచ్చివాడిని చేసిపడేసింది. ప్రస్తుతం డీజే టిల్లు సీక్వెల్ తెరకెక్కుతోంది. అక్టోబర్ 3 నుంచి కొత్త షెడ్యూల్ ప్రారంభం అవుతోంది. ఈ సందర్భంగా కొత్త రాధిక సెట్ లోకి అడుగు పెట్టబోతోందని స్వయంగా డీజే టిల్లు చెప్పాడు. స్వాతి ముత్యం ప్రీ రిలీజ్ ఈవెంట్ లో కొత్త రాధికను ఎంపిక చేసినట్లు తెలిపాడు. ఇంతకీ కొత్త రాధిక ఎవరూ అనేది మీ సందేహం కదా! ఆ అవకాశాన్ని ముందుగా శ్రీలీలకు అందించారు. ఆమె కోసం కొంత కాలం వేచి చూశారు. కాని శ్రీలీల చేతినిండా చిత్రాలతో డీజే టిల్లు కోసం డేట్స్ లాక్ చేయడం కుదరకపోవడంతో, ఆ అవకాశాన్ని రింగుల జుట్టు సుందరీ అనుపమ పరమేశ్వరన్ అందుకుందట. ఒకప్పుడు హోమ్లీ క్యారెక్టర్స్ చేస్తూ వచ్చిన అనుపమ ఇప్పుడు మాస్ గా మారింది. కార్తికేయ2లో యాక్షన్ సీన్స్ లో కూడా నటించింది.ప్యాన్ ఇండియా మార్కెట్ లోనూ గుర్తింపు తెచ్చుకుంది. రౌడీ బాయ్స్ లో లిప్ కిస్ వరకు వెళ్లింది.
అందుకే తనకు రాధిక పాత్రలో నటించే అవకాశం ఇస్తున్నారట. డీజే టిల్లు మొదటి భాగం సంచలన విజయం సాధించింది. సిద్దు జొన్నలగడ్డ నటనకు స్పెషల్ గా ఫ్యాన్ బేస్ ఏర్పడింది. దాంతో సిద్దూ నటిస్తున్న డీజే టిల్లు సీక్వెల్ పై భారీ అంచనాలు ఉన్నాయి. ఇప్పటికే మొదటి భాగం తెరకెక్కించిన దర్శకుడు మారాడు. ఇప్పుడు హీరోయిన్ కూడా మారిపోయింది. మరి న్యూ టీమ్ డీజే టిల్లు ఏ మేరకు మెప్పిస్తాడో తెలియాలంటే వచ్చే ఏడాది వరకు వెయిట్ చేయాల్సిందే.