పవన్ కు షాక్ ఇచ్చిన వెంకీ?
By KTV Telugu On 8 October, 2022
పవర్ స్టార్ చేయాల్సిన రీమేక్ లో విక్టరీ?
ఓరి దేవుడా ఇప్పుడెలా అంటున్న ఫ్యాన్స్!
విక్టరీ వెంకటేష్,పవన్ కళ్యాణ్ మధ్య మంచి స్నేహం ఉంది. పవర్ స్టార్ సిల్వర్ జూబ్లీ మూవీ అజ్ఞాతవాసి మూవీలో వెంకీ నటించాడు. వీరిద్దరు కలసి గోపాల గోపాల సినిమా చేసారు. అయితే పవన్ ఇప్పుడు ఓ తమిళ సినిమాను తెలుగులో రీమేక్ చేయాలనుకున్నాడు. సముద్రఖని దర్శకత్వంలో తమిళంలో వచ్చిన వినోదయ సిత్తం చిత్రాన్ని తెలుగులో తాను చేయాలనుకున్నాడు. ఇందులో పవన్ దేవుడుగా, అతని భక్తుడిగా సాయి ధరమ్ తేజ్ నటిస్తాడని బాగా ప్రచారం సాగింది.
అన్ని కుదిరి ఉంటే ఈ మూవీ ఇప్పటికే పట్టాలెక్కాల్సింది కూడా.. కాని పవన్ హరి హర వీరమల్లు షూటింగ్ లో బిజీగా ఉన్నాడు. దాంతో ఈ రీమేక్ ఆలస్యమవుతోంది. ఇంతలో వెంకటేష్ ఓరి దేవుడా అనే సినిమాలో ప్రేక్షకుల ముందుకు వచ్చేందుకు సిద్ధమవుతున్నాడు. దీపావళి కానుకగా అక్టోబర్ 21న ఈ చిత్రం ప్రేక్షకుల ముందుకు రానుంది. మాస్ కా దాస్ విశ్వక్ సేన్ హీరో. ఈ సినిమా ట్రైలర్ రిలీజైంది. ట్రైలర్ చూసిన పవన్ ఫ్యాన్స్ కు మైండ్ బ్లాక్ అయింది. ఇది పవన్ చేయాల్సిన సినిమా కదా అనుకున్నారు. వెంటనే ఓరి దేవుడా వికీ ఓపెన్ చేసి చూస్తే ఈ సినిమా కూడా తమిళ రీమేక్ అని అర్ధమైంది. రెండేళ్ల క్రితం తమిళంలో విడుదలై భారీ విజయాన్ని అందుకున్న ఓ మై కడవులే చిత్రాన్నే తెలుగులో ఓరి దేవుడా పేరుతో రీమేక్ చేసారు. తమిళ వర్షన్ ను తెరకెక్కించిన దర్శకుడు అశ్వత్ తెలుగు రీమేక్ ను కూడా తెరకెక్కించాడు. ఓరిజినల్ వర్షన్ లో విజయ్ సేతుపతి పోషించిన పాత్రను తెలుగులో విక్టరీ చేసాడు. సేమ్ టు సేమ్ ఇదే సబ్జెక్ట్ తో వినోదయ సిత్తం కూడా కనిపిస్తోంది. ఈ దశలో పవన్ తమిళ రీమేక్ పై పునరాలోచిస్తాడా అనేది వేచి చూడాలి.