లేక్ వ్యూ కట్టడాలే హైడ్రా నెక్స్ట్ టార్గెట్
By KTV Telugu On 20 September, 2024
KTV TELUGU :-
చెరువులు, కుంటల సమీపంలో నిర్మించిన ప్రాజెక్టులపై హైడ్రా ఫోకస్ పెట్టింది. ఆయా నిర్మాణాల్లో చెరువు భూమి కలిసిపోయిందా, లేదా? అనే విషయమై హైడ్రా అధికారులు విచారణ ప్రారంభారు. ముఖ్యంగా లేక్ వ్యూ పేరుతో చేపట్టిన భారీ ప్రాజెక్టుల నిర్మాణాలను విచారించి అక్రమ నిర్మాణాలని తేలితే కూల్చేవేసేందుకు సిద్ధమవుతున్నారు.
గ్రేటర్ హైదరాబాద్ పరిధిలోని అక్రమ నిర్మాణాలపై హైడ్రా (హైదరాబాద్ డిజాస్టర్‌ రెస్పాన్స్‌ అండ్‌ అసెట్‌ ప్రొటెక్షన్‌ ఏజెన్సీ) ఉక్కుపాదం మోపుతోన్న సంగతి తెలిసిందే. ఇప్పటికే నగరంలోని వందల కట్టడాలను హైడ్రా అధికారులు నేలమట్టం చేశారు. వేల కోట్ల విలువైన ప్రభుత్వ భూమిని తిరిగి సర్కారుకు అప్పగించారు. ప్రస్తుతం హైడ్రా కూల్చివేతలకు కాస్త బ్రేక్ ఇచ్చారు. కూల్చివేతలపై అభ్యంతరాలు వ్యక్తం అవుతుండటంతో.. పక్కా ఆధారాలతో కూల్చేవేతలు చేపట్టాలని హైడ్రా భావిస్తోంది. పెద్ద పెద్ద నిర్మాణ సంస్థలకు చెందిన ‘లేక్ వ్యూ’ ప్రాజెక్టులపై ప్రస్తుతం హైడ్రా ఫోకస్ పెట్టింది.
పెద్ద పెద్ద రియల్ ఎస్టేట్ సంస్థలు గతంలో ‘లేక్ వ్యూ’ పేరుతో ప్రాజెక్టులు చేపట్టాయి. లేక్ వ్యూ అపార్ట్‌మెంట్లకు డిమాండ్ ఎక్కువగా ఉండేది. చెరువు పక్కన ఏదేనీ కొత్త ప్రాజెక్టు మొదలైందంటే చాలు.. కొనుగోలుదారులు క్యూ కట్టేవారు. హైడ్రా కూల్చివేతలతో ప్రస్తుతం సీన్ మెుత్తం రివర్స్ అయింది. చెరువులు, కుంటల పక్కనే లేక్ వ్యూ అపార్ట్‌మెంట్లు అంటే చాలు జంకుతున్నారు. ఆయా ప్రాజెక్టుల్లో ఇంటిని కొనుగోలు చేసేందుకు వెనకడుగు వేస్తున్నారు. లేక్ వ్యూ ఇళ్లను కొనుగోలు చేసేందుకు ఒకటికి రెండు సార్లు ఆలోచిస్తున్నారు.
కూకట్‌పల్లి, శేరిలింగంపల్లి, చార్మినార్‌ జోన్లలోని పలు చెరువుల సమీపంలో ఇప్పటికే పలు రియల్ ఎస్టేట్ సంస్థలు లేక్ వ్యూ ప్రాజెక్టులను నిర్మించాయి. మరికొన్ని నిర్మాణ దశలో ఉన్నాయి. ఆ ప్రాజెక్టులపై స్థానికుల నుంచి హైడ్రాకు ఫిర్యాదులందాయి. దీంతో హైడ్రా రంగంలోకి దిగింది. తాము చెరువును ఆక్రమించలేదనే రియల్ ఎస్టేట్ సంస్థలు వాదన వినిపిస్తుండగా.. ఏళ్ల నాటి చెరువుల పటాలను హైడ్రా నిర్మాణ సంస్థల ముందుంచుతోంది. అయినా కొందరు నిర్మాణదారులు ఆయా స్థలాలను పార్కులు, పిల్లలు ఆడుకునే ఆట స్థలాలు, సెట్ బ్యాక్ స్థలాలుగా చూపిస్తు్న్నారు.
దీంతో పక్కా ఆధారాలతో ఆయా లేక్ వ్యూ అపార్ట్‌మెంట్లను కూల్చేందుకు హైడ్రా రంగం సిద్ధం చేస్తున్నట్లు తెలిసింది. భారీ భవనాలను ఎలా కూల్చాలనే విషయమై బాహుబలి క్రేన్ల నిర్వాహకులతో మాట్లాడుతున్నట్లు సమాచారం. ప్రాజెక్టులపై విచారణలు పూర్తయ్యాక కూల్చివేతలను ప్రారంభించనున్నట్లు హైడ్రా వర్గాలు వెల్లడిస్తున్నాయి
మరిన్ని వార్తలకు ఎక్కడ క్లిక్ చేయండి
మరిన్ని వీడియోలకు ఎక్కడ క్లిక్ చేయండి…